Početna FILLIMI Kamberi fajëson Beogradin për diskriminim ndaj shqiptarëve

Kamberi fajëson Beogradin për diskriminim ndaj shqiptarëve

Bujanovačke23. Jul 2020.FILLIMI, POLITIKË0

Bujanoc, 23. korrik 2020. – Kryetari i Partisë për Veprim Demokratik- PVD, Shaip Kamberi, i cili është edhe deputet popullor në parlamentin republikan, ka adresuar një sërë kritikash ndaj autoriteteve të Beogradit për pozitën e shqiptarëve.

Me anë të një postimi në Facebook, Kamberi ka potencuar se ata që fajësojnë shqiptarët për koalicion monoetnik duhet fillimisht ta shohin shtetin dhe qeverinë se sa multietnike është, ndërsa në nivelin lokal ka përmendur Medvegjën.

Le të dëshmohet Qeveria e Serbisë në Preshevë, me më shumë të drejta politike dhe zhvillim ekonomik, meqë kriteri qenka që partia në pushtet në Beograd të ketë pushtet përcaktues në qeverisjen lokale

Kryetari i deritanishëm i komunës së Bujanocit ka theksuar se PVD do të kontribuojë në ruajtjen e qeverisjes së re në këtë komunë duke dhënë angazhimin e saj maksimal:

–Përgëzime për themelimin e institucioneve lokale të qeverisjes së re në komunën e Bujanocit. Si partnere bashkëqeverisëse, Partia për Veprim Demokratik do të kontribuojë në vazhdimlin e qeverisjes së mirë në shërbim të të gjithë qytetarëve të Bujanocit.

–Atyre që trumbetojnë për problemet e qeverisjeve monoetnike të cilat mund të ndikojnë negativisht në investime nga qeveria republikane, ju kujtojmë se mirë do të ishte ta analizojnë se sa multietnike janë institucionet që janë nën kompetenca të qeverisë republikane, apo sa multietnike është sot qeverisja e Medvegjës ?

–Qeverisja lokale e Bujanocit ka qenë « multietnike » që 18 vite, por kjo nuk ka ndikuar që qeveria republikane t’i integrojë shqiptarët në institucione ku ata mungojnë pothuajse tërësisht dhe as të investojë seriozisht që ta sanojë gjendjen e rëndë socio-ekonomike.

–Pa e harruar edhe Preshevën. Çfarë përfitojnë sot substancialisht preshevarët nga fakti që e ka qeverisjen lokale drejtpëdrejtë të varur nga partia në pushtet në Serbi?

–Le të dëshmohet Qeveria e Serbisë në Preshevë, me më shumë të drejta politike dhe zhvillim ekonomik, meqë kriteri qenka që partia në pushtet në Beograd të ketë pushtet përcaktues në qeverisjen lokale. Apo edhe në Medvegjë, ku qeveris vetëm partia në pushtet në Beograd dhe ku pothuajse nuk ka më “shqiptarë problematikë”.

Është pushteti në Beograd i cili e ka bllokuar dialogun dhe nuk e dëshiron integrimin e minoriteteve, barazi në të drejta midis qytetarëve dhe zhvillim të rajoneve të margjinalizuara

–Pastaj, vallë shteti qenka vetëm i serbëve? Që kur serbët nuk qenkan në pushtet lokal, atëherë shteti nuk përkujdeset per shtetasit e saj?

–Ka vite të tëra që Partia për Veprim Demokratik kërkon rifillimin e dialogut me Qeverinë e Serbisë, nën lehtësimin e bashkësisë ndërkombëtare, për implementimin e marrëveshjeve të nënshkruara edhe nga Beogradi zyrtar, për integrimin e shqiptarëve të nënpërfaqësuar, për avancimin e të drejtave të tyre kolektive të diskriminuara dhe për zhvillimin socioekonomik të rajonit të margjinalizuar.

–Është pushteti në Beograd i cili e ka bllokuar dialogun dhe nuk e dëshiron integrimin e minoriteteve, barazi në të drejta midis qytetarëve dhe zhvillim të rajoneve të margjinalizuara.

–Adresa parësore e përgjegjësisë është në Beograd, jo në Bujanoc.

–Beogradi duhet të heq dorë nga bllokimi dhe refuzimi i dialogut për integrimin e shqiptarëve dhe për zhvillimin socioekonomik të rajonit.

–Ne jemi të hapur dhe të gatshëm për dialog.

-Çdo ditë.