Bujanoc, 16. shkurt 2022. Kryetari i Partisë për Veprim Demokratik dhe ish-deputeti Shaip Kamberi, thotë se përfaqësuesit politikë të shqiptarëve në Serbi nuk duhet të bashkohen me qeverinë e Aleksandër Vuçiqit, por as me partitë opozitare.

“Nuk duhet të bëhemi pjesë dhe partner i një qeverie të tillë, as sot e as nesër. Aktualisht në Serbi nuk ka asnjë forcë politike serioze demokratike dhe progresive që meriton të bëhemi pjesë integrale apo partnerë me të, qoftë direkt në pushtet apo indirekt në parlament me pseudoopozitë”, ka thënë Kamberi në Facebook pas shpërndarjes së djeshme të Kuvendit të Serbisë dhe shpalljes së zgjedhjeve parlamentare.

Ai shtoi se shqiptarëve nuk u nevojiten funksionet ministrore dhe sekretarë në qeverinë e Vuçiqit, apo qeverinë e krijuar nga opozita e sotme në Serbi pas zgjedhjeve të 3 prillit, për interesa personale, por për “zbatimin e marrëveshjeve për Luginën e Preshevës dhe për liri, zhvillim dhe të drejta kolektive”.

Për veprimet e deritanishme të tij në parlament, ai tha se do të ishte naiv nëse do të kishte menduar se veprimet dhe politikat e tij do të ndryshonin politikat dhe vendimet e kësaj qeverie në Beograd.

– Është shumë më e rëndësishme se çfarë lloj politike ndiqni kur përfaqësoni popullin. Prandaj, deputetët Luginës në Kuvendin e Serbisë marrin kuptim dhe vlerë nga politika që përfaqësojnë dhe zbatojnë, e jo vetëm nga prania apo numri i tyre – deklaroi Kamberi.

Sipas tij, shqiptarët ende kanë nevojë për veprim dinjitoz dhe të mirëfilltë opozitar në parlament, i cili do të tërheqë vëmendjen e komunitetit ndërkombëtar dhe do të “rrisë presionin politik dhe institucional ndaj qeverisë në Beograd për çështjen e Luginës së Preshevës në veçanti dhe demokracisë në përgjithësi”.

Në përbërjen e fundit të Kuvendit të Serbisë, partitë shqiptare nga Bujanoci dhe Presheva kishin tre deputetë, të cilët iu bashkuan grupit parlamentar me Partinë e aksionit demokratik të Suljeman Uglaninit nga Sanxhaku.

Nuk dihet ende nëse partitë shqiptare do të dalin së bashku në zgjedhjet e 3 prillit.

Alternativa për ndryshime paraprakisht kishte paralajmëruar se nuk do të mbështesë një listë të vetme, nëse vendi i parë në mesin e kandidatëve për deputetë nuk i takon kësaj partie, për të cilën Bujanovaçke tashmë ka shkruar.