Shkruan: N. Stevanoviq

Bujanoc, 5 janar 2023. Ndërmarrja Publike e Bujanocit “Komunalia” edhe në vitin 2023 do të menaxhohet nga Autoriteti i përkohshëm i udhëhequr nga Ruzhdi Halili. Në seancën e fundit të Kuvendit në fund të vitit Halilit iu vazhdua mandati edhe për gjashtë muaj.
Në vitin 2020, ai u emërua për herë të parë kryetar i Autoritetit të përkohshëm dhe iu dha një afat prej 3 muajsh për të “bërë një pasqyrë të situatës në kompani dhe për të paraqitur një raport në Kuvend”.
Më pas qeveria komunale njoftoi se pas përfundimit të afatit, Kuvendi do të emërojë një drejtor me kompetenca të plota ose ushtrues detyre, pra nuk do të ketë më Autoritet të përkohshëm.
Kjo nuk ndodhi as pas dy vitesh e gjysmë.
Gjatë asaj kohe qytetarët janë ankuar për furnizimin e dobët me ujë, gjendjen katastrofike të deponisë së qytetit, ku shpërthejnë rregullisht zjarre, si dhe plehrat në rrugë.
Pakënaqësia kulmoi me një protestë të fshatarëve rreth Bujanocit për shkak të mungesës së ujit në vitin 2021.
Autoriteti i përkohshëm për menaxhimin e ndërmarrjes u formua dhjetë vjet më parë nga qeveria komunale e kryesuar nga Nagip Arifi.
Synimi ishte që Autoriteti i Përkohshëm të nxirrte kompaninë nga kriza financiare dhe situata e keqe.
Bashkë me Halilin si kryetar, në këtë trup si anëtarë mbeten edhe Naim Salihu dhe Isak Rashiti, thuhet në vendimin për vazhdimin e mandatit.