Bujanoc, 30. janar 2023. Qentë endacakë kanë sulmuar një vajzë në afërsi të Gjimnazit “Sezai Suroi”, pretendon politikani Arbër Pajaziti. Drejtori i shkollës, Zejni Fejzullahu, thotë për Bujanovaçke se askush nuk e ka raportuar një rast të tillë.
“Sot në oborrin e gjimnazit Sezai Suroi është sulmuar një nxënës nga qentë endacak dhe përveç traumës i kanë shkaktuar edhe lëndime fizike”, thuhet në publikimin e bërë javën e kaluar nga Arbër Pajaziti, nënkryetar i Alternativës për Ndryshim.
Drejtori i shkollës, Zejni Fejzullahu, thotë për portalin tonë, se askush nuk e ka raportuar rastin dhe se nuk ka ndodhur në oborrin e shkollës.
– Për atë rast kam dëgjuar, por jo në shkollë, mirëpo e kam marrë vesh përmes portaleve informative. Askush nuk na raportoi, askush nuk u ankua, që do të thotë se sigurisht nuk ka ndodhur në oborrin e shkollës, por jashtë tij– thotë Fejzullahu.
Kontrata me kompaninë Avenija nga Vërnjaçka Banja, e cila ishte angazhuar nga NP Komunalia për largimin e qenve të braktisur nga rrugët e Bujanocit, ka skaduar dhe pritet të nënshkruhet një kontratë e re, për të cilën më herët ka shkruar Bujanovačke.
Problemi i qenve endacak, siç thotë Fejzullahu, është i pranishëm kudo, ata shpesh i takojmë edhe brenda edhe jashtë shkollës, sikurse kudo nëpër qytet, por askush zyrtarisht deri më tani nuk është ankuar për ta.
Në statusin e tij, Pajaziti po ashtu thekson se para disa muajsh një mjek është sulmuar nga qen endacak në oborrin e Shtëpisë së shëndetit në Bujanoc, sikur që edhe qytetarët sulmohen çdo ditë nga qentë endacak në sheshin e qytetit.
Pajaziti apelon qytetarët që të kujdesen për veten e tyre, sepse pushteti lokal ka kohë që nuk kujdeset për ta, duke theksuar se vetëqeverisja lokale ka angazhuar NP Komunalia për largimin e qenve endacak, por ajo kompani nuk është e lidhur me këtë aktivitet.