Shkruan: N. Stevanoviq

Bujanoc, 8 shkurt 2023. (Foto nga arkivi: Dita e Flamurit në Bujanoc 20121) – Deputeti i Bujanocit, Shaip Kamberi, ka dorëzuar sot në Kuvendin e Serbisë propozimin për ndryshimin e Ligjit për mbrojtjen e të drejtave dhe lirive të pakicave kombëtare, i cili parasheh përdorimin e lirë të simboleve kombëtare.
Kamberi propozon ndryshimin e nenit 16, paragrafit 2 të këtij ligji, i cili ndalon përdorimin e simboleve kombëtare nëse ato janë identike me simbolet e një shteti tjetër.
“Kam kërkuar ndryshimin e plotë të këtij neni, heqjen e pengesave për përdorimin e simboleve, me propozimin që simbolet e pakicave të përdoren lirisht dhe zyrtarisht gjatë gjithë vitit në institucionet e vetëqeverisjes lokale dhe organet shtetërore në të gjitha komunat ku gjuha e pakicës është në përdorim zyrtar”, tha ai.
Në rastin e komunave ku pakicat kombëtare përbëjnë më pak se 5 për qind të popullsisë, ky propozim kërkon leje për përdorimin e flamurit gjatë festimit të festave kombëtare të pakicave.
Propozimi i Kamberit u mbështet nga deputetët Enis Imamoviq dhe Selma Kuçeviq nga PAD të Sanxhakut dhe deputetit të pavarur Aleksandar Olenik.
Shqiptarët në Serbi me vite të tëra kanë refuzuar t’i ndryshojnë simbolet e tyre kombëtare, qoftë edhe në një detaj, në mënyrë që ato të ndryshojnë nga simbolet e shtetit të Shqipërisë ndërkaq për shkak të vendosjes së flamurit, janë ngritur edhe disa kallëzime për kundërvajtje ndaj politikanëve dhe drejtorëve shqiptar, që drejtojnë ndërmarrje dhe ente publike në Bujanoc.