Bujanoc, 25 shkurt 2023. Kryeministri i Kosovës, Albin Kurti, ka shkaktuar përçarje të thellë te politikanët shqiptarë në Bujanoc dhe Preshevë, thotë kryetari i komunës së Preshevës dhe kryetar i Alternativës për Ndryshim, Shqiprim Arifi.

Ai ka vlerësuar se Lugina e Preshevës, siç e quajnë shqiptarët zonën e Bujanocit dhe Preshevës, nuk pret asgjë më shumë nga Kurti, i cili, sipas Arifit, kërcënoi partneritetin me Amerikën, transmeton portali kosovar Reporteri.

“Politika e Kurtit në Luginën e Preshevës nuk ndryshon nga politika në Shqipëri dhe Maqedoni. Është treguar se ai në vitin e kaluar ka thelluar përçarjet në spektrin politik të Luginës së Preshevës. Ai u përplas drejtpërdrejt me Bashkimin Evropian dhe SHBA, kërcënoi seriozisht partneritetin me Amerikën, prandaj dyshoj në të. Keqpërdorimi i mjeteve për Luginën e Preshevës nga Kurti dhe Besnik Bislimi tregon qartë se nuk kemi çfarë të presim nga Kurti”, tha Arifi për Teve1.

Sipas tij, shqiptarët në jug të Serbisë arritën që pas 30 vitesh të bashkohen në një listë të përbashkët për zgjedhjet parlamentare serbe në vitin 2020 dhe se aspirata e vazhdueshme për bashkim të spektrit politik u ndal kur Kurti u bë kryeministër.

Ai shtoi se Kurti po ndërhynte edhe në “proceset e brendshme demokratike në Luginë”.