Bujanoc, 03 prill 2023. Klubi i futbollit Tërnoci nga Tërnoci i Madh afër Bujanocit ka njoftuar se pas skandalit në Vlladiçin Han, në ndeshjen e xhiros së 19-të të Zonës Jug të shtunën, po mendon të heqë dorë nga gara.
Ndeshja në Vladiçin Han ndërmjet skuadrës vendase Morava dhe FK Tërnoci u ndërpre në minutën e 65-të pasi tre lojtarë të skuadrës së Tërnocit morën karton të kuq.
“Shkaku kryesor për një përfundim të tillë të ndeshjes ishte arbitri që me vendime skandaloze përjashtoi 3 lojtarë në të njëjtën kohë dhe ndëshkoi pjesën tjetër të skuadrës me kartonë të verdhë, kështu që u detyruam ta ndërpresim ndeshjen – thonë nga ky klub.
Me këtë rast u shpreh edhe deputeti nga Tërnoci, Shaip Kamberi, i cili tha se kartonët e kuq janë të dedikuar për të gjithë shqiptarët.
“Kjo sjellje e turpshme e arbitrit, e paprecedentë në fushat e futbollit, ishte e qëllimshme, në mënyrë që skuadra jonë të mbetej pa lojtarë të parë në dispozicion për ndeshjet e radhës, veçanërisht për ndeshjen kundër Allakincës në xhiron tjetër”, thuhet në njoftimin e klubit.
Ata theksuan se tashmë është bërë e qartë se pengesa më e madhe për klubin e Tërnocit është Federata, ndërsa arsyeja kryesore është përkatësia kombëtare e futbollistëve.
“Është e pamundur të garosh në një ambient të tillë, sidomos nëse mendon se të tjerët të shikojnë me sy armiqësor. Është e pakuptimtë që djemtë tanë të djersiten dhe të rrezikojnë shëndetin e tyre në Ligë, zyrtarët e së cilës, në vend që të nxisin fer-playin sportiv dhe të ndërtojnë ura bashkëpunimi ndërmjet kombeve, mbjellin përçarje dhe urrejtje”, thonë nga klubi i Tërnocit.
Ata bënë të ditur se menaxhmenti në ditët në vijim do të marrë vendim nëse do të vazhdojnë pjesëmarrjen në gara.