Shkruan: N. Stevanoviq
Bujanoc, 1. maj 2023. (Foto ilustrim nga Facebook) – Sipas rezultateve zyrtare të regjistrimit të vitit 2022, shqiptarët përbëjnë gati një të tretën e popullsisë së rrethit të Pçinjit, ku jetojnë gjithsej 193,802 qytetarë. Nga ky numër, 56,834 janë deklaruar si shqiptarë në regjistrim, që është 29.3 për qind.
Ky është një argument që politikanët shqiptarë e theksojnë shpesh kur flasin për përfaqësimin e pamjaftueshëm të bashkëkombasve të tyre në institucionet shtetërore, veçanërisht duke vënë në pah shembullin e spitalit të Vranjës – Qendrës shëndetësore të Qarkut, ku siç thonë ata nuk ka asnjë shqiptar të punësuar.
Rezultatet e regjistrimit të publikuar të premten treguan se komuna e Bujanocit ka 41.068 banorë, prej të cilëve 25.465 janë shqiptarë, 10.467 serbë dhe 3.532 romë, dhe se numri i përgjithshëm i shqiptarëve në Serbi është 61.687, që është gjysma e numrit të vlerësuar nga politikanët shqiptarë. Gjithashtu, sipas të dhënave zyrtare, pakica kombëtare shqiptare është e katërta më e madhe në Serbi, pas hungarezëve, boshnjakëve dhe romëve.
Sa i përket rrethit të Pçinit, minoriteti i dytë për nga numri janë romët – 10,877 (5,6 për qind), dhe 4,970 (2,5 për qind) bullgarë, nga të cilët 4,075 jetojnë në Bosilegrad. Shumica janë serbë – 112.011.
Komuna e Bujanocit me 41.068 është e dyta në rreth për nga popullsia pas Vranjës, ku jetojnë 74.381 banorë. Regjistrimi gjithashtu tregoi se numri i burrave (20.684) dhe i grave (20.384) në Bujanoc ishte pothuajse i barabartë.
Komuna më e vogël për nga popullsia është Tërgovishtja, ku jetojnë 4316 banorë.