Bujanoc, 11 maj 2023. (Foto: MB) – Mjekët e Ushtrisë Serbe këtë javë kanë realizuar një aksion për ofrimin e ndihmës mjekësore për fshatarët në rrethinën e Bujanocit, Bosilegradit, Sjenicës dhe Beoçinit, të cilët kanë vështirësi në qasjen në sistemin shëndetësor.
Bëhet fjalë për aksionin tradicional “Mjeku ushtarak në fshat” i cili realizohet në kuadër të projekteve të bashkëpunimit civilo-ushtarak të Ushtrisë Serbe me Kryqin e Kuq, vetëqeverisjet lokale dhe qendrat shëndetësore.
“Më shumë se 150 ekzaminime shëndetësore parandaluese janë kryer në ambulancat e krijuara përkohësisht, si dhe vizita në shtëpi për personat me lëvizje të kufizuar dhe palëvizshmëri. Me këtë rast janë shpërndarë edhe pako me ushqime bazë të ofruara nga Kryqi i Kuq”, njofton Ministria e Mbrojtjes.
Siç u tha, si gjithmonë deri më tani, pjesëtarët e Forcave të Armatosura të Serbisë priten ngrohtësisht nga qytetarët, të cilët me mirënjohje për ndihmën e dhënë, theksojnë se kanë besimin më të madh në Forcat e Armatosura të Serbisë dhe se disa herë është dëshmuar se mund të mbështeten në të kur kanë nevojë më së shumti për ndihmë.
“Ushtria serbe realizon projekte të bashkëpunimit civilo-ushtarak në të gjitha pjesët e vendit. Ajo ka ndihmuar shumë herë në ndërtimin e rrugëve dhe tubacioneve të ujit, pastrimin e borës, furnizimin me ujë dhe kujdesin shëndetësor të popullatës vendase, gjë që do të vazhdojë ta bëjë edhe në të ardhmen për të forcuar besimin e ndërsjellë dhe krijimin e kushteve për një jetë më të mirë për qytetarët e Serbisë”, thanë nga ministria.
