Shkruan: N. Stevanoviq
Bujanoc, 22. gusht 2023. Kreu i Alternativës për Ndryshim, partisë opozitare në Bujanoc, Arbër Pajaziti, thotë se politikanët shqiptarë që tani po ankohen për renovimin e dy shkollave serbe në Bujanoc, duke thënë se është diskriminim ndaj shqiptarëve, janë thjeshtë hipokritë. Pajaziti nuk përmendi askënd, por kryetari i Këshillit Kombëtar të Shqiptarëve (KKSH) Nevzad Lutfiu e njohu veten në mesin e “hipokritëve”, duke konstatuar se Pajaziti e kishte fjalën për të.
– Në buxhetin e komunës së Bujanocit për vitin 2023 është paraparë renovimi i shkollave “Sveti Sava” dhe “Branko Radiçeviq” në vlerë prej 5.2 milionë euro. Për këtë vendim votuan këshilltarët e shumicës (shqiptarë). Ne këshilltarët e opozitës votuam kundër. Tash ata që kanë votuar pro ankohen se janë diskriminuar nga shteti dhe vetë kanë marrë pjesë në të – tha Pajaziti.
Kujtojmë se kreu aktual i KKSH-së, Lutfiu, para se të kalonte në Këshillin kombëtar ka qenë anëtar i Lëvizjes për Progres Demokratik (LPD), një nga partitë në pushtet. Pas marrjes së postit në KKSH, ai kritikoi rinovimin e shkollave ku mësimi zhvillohet në gjuhën serbe, për të cilën shkroi Bujanovačke.
– Këta janë të njëjtët që votuan pa kushte për dhënien e lejes për ndërtimin e banesave për “refugjatët” nga Kosova”, ka shtuar Pajaziti.
Ishte vetë Lutfiu që konkludoi se Pajaziti në postimin e tij po i drejtonte atij gishtin për politikanët hipokritë.
Foto: Nevzad Lutfiu
– Nëse Arbëri me postimin e tij ka aluduar në mua, mund t’i them se nuk jam kundër investimit në shkollat serbe. Përkundrazi, ndihem mirë që nxënësit serbë do të kenë kushte të mira. Por, si kryetar i KKSH-së, jam kundër racizmit që Serbia tregon ndaj shqiptarëve, duke refuzuar projektet për rindërtimin e shkollave shqipe. Së dyti, për votën për ndarjen e apartamenteve morëm mbështetje nga Shqipëria – thotë Lutfiu.
Përndryshe, në mars të këtij viti presidenti i Serbisë, Aleksandar Vuçiq, gjatë vizitës së tij në Bujanoc ka njoftuar se do të rinovohen edhe shkollat ku mësimi zhvillohet në gjuhën shqipe, ndërsa kryeshefja e Drejtoratit komunal për investime dhe zhvillim, Fazila Azemoviq, ka thënë më herët se këto projektet janë gati.