Shkruan: I. Jovanoviq
Bujanoc, 24. gusht 2023. Nagip Tashi nga Tërnoci, i cili prej muajsh po përpiqet të ndërtojë një park në qendër të fshatit, është në gjysmë të fazës së parë, që përfshin gjelbërimin e zonës. Ai ka vullnet, ka mbledhur me sukses mjete deri më tani, por siç thotë ai ka ende shumë për të bërë dhe fton të gjithë ata që mund të përfshihen.
“Nëse vazhdojmë me këtë ritëm dhe përfundojmë këtë fazë, së shpejti do të na duhen karrige, pemë, lodra për fëmijë, gardhe, ndriçim dhe vendosje kamerash për vëzhgim 24/7”, tha Tashi për portalin tonë.
Siç thotë ai, ZAK-u do të kujdeset për vendosjen e kamerave, për çka i është shumë mirënjohës.
– Duke pasur parasysh resurset që kam, besoj se do ta përfundoj me sukses këtë fazë të gjelbërimit të hapësirës. Mund të ndeshem me vështirësi, por do të mundohem t’ia dalim – shton Tashi.
Ai thotë se nuk e kupton sesi në shekullin e 21 njerëzit që kanë para nuk kanë dëshirë dhe vullnet për të bërë diçka të mirë për vendin e tyre, sidomos për fëmijët, prandaj edhe një herë i bën thirrje të gjithëve që të bashkohen dhe të mbarojnë parkun deri në fund.
Sa i përket karrigeve, pemëve, lodrave për fëmijë dhe ndriçimit, ai thotë se do të ketë nevojë për mjete shtesë.
– Deri tani kam arritur të mbledh mjete dhe të blej gjithçka që është e nevojshme për këtë fazë, nuk kam kërkuar mbështetje financiare sepse besoja se ishte e mjaftueshme për fazën e parë. Unë personalisht jam përpjekur të mos mbledh shumë fonde sepse përgjegjësia është e madhe, sidomos kur bëhet fjalë për fondet e huaja – shpjegon Tashi.
Tashi shton se kushdo që është i interesuar të blejë, p.sh., karriget, lodrat dhe fidane, do t’ia lehtësonte shumë, pasi në atë rast do t’i duhej të shqetësohej vetëm për montimin e tyre. Një tjetër opsion, thotë ai, është publikimi i çmimeve të të gjitha gjërave që duhen blerë dhe të vazhdojë si më parë me mbledhjen e fondeve.
– Të bëjmë edhe një hap përpara – thotë Tashi dhe falenderon të gjithë ata që kanë qenë me të deri tani.
Kujtojmë se Tashi në mesin e muajit mars ka nisur një peticion për ndërtimin e parkut në fshatin Tërnoc, me të cilin ka mbledhur 517 nënshkrime dhe ka dorëzuar peticionin në Bashkësinë lokale të Tërnocit dhe Komunën e Bujanocit, ndërsa qysh në fillim të majit filloi pastrimin e tokës, për të cilën Bujanovaçke kishte shkruar më parë.
Përpjekjen për ndërtimin e një parku Tashi e konsideron sfidë dhe detyrim për brezat që do të vijnë dhe për këtë, siç thotë ai, është i gatshëm të marrë përgjegjësinë nëse merr mbështetje financiare.
Tashi është punëtor i Shtëpisë së kulturës në Bujanoc dhe ky nuk është projekti i parë që ka filluar. Simboli me emrin e qytetit, i cili u vendos në sheshin në Bujanoc, ishte ideja e tij, të cilën ai e realizoi me sukses.