Bujanoc, 29. gusht 2023. Deputeti nga Bujanoci, Shaip Kamberi, thotë se gjyqësori e legjitimon ksenofobinë ndaj shqiptarëve në Serbi. Reagimi i tij vie pasi që, siç pretendon ai, familja shqiptare Bajrami nga Maqedonia e Veriut është shpallur nga një gjykatë në Beograd jo e mirëseardhur (non grata) në Serbi, deri në vitin 2030, pasi siç thotë ai, djali i tyre i mitur kishte veshur një bluzë me shqiponjë dykrenore, me stemë shqiptare.
– Një familje shqiptare u keqtrajtua dhe u dënua vetëm sepse djali i tyre kishte veshur një bluzë me shqiponjë dykrenare gjatë tranzitit nëpër Serbi – thotë Kamberi.
Me rastin e ngjarjeve me familjen shqiptare, Kamberi ka nisur një iniciativë në Facebook dhe ka kërkuar nga të gjithë shqiptarët që t’i ngjyrosin kuqezi profilet në këtë rrjet social.
“Shqiponja është e jona. Prandaj e mbajmë me krenari. Të gjithë shqiptarët kudo që jetojnë. Tendenca për t’na ndalu shqiponjën është tentativë për t’na mohu identitetin. Nu pranojmë. Ta veshim facebookin kuq e zi.”, ka shkruar ai.
Sipas tij, shteti i Serbisë legalizon urrejtjen ndaj shqiptarëve, gjë që reflektohet në procedurat gjyqësore.
-Gjykata e tjetër serbe, ajo në Vranjë, ndaloi shfaqjen e dy filmave të autorit Gani Veseli nga Presheva, me arsyetimin se Qendra e Filmit të Serbisë në Beograd konstatoi se njëri film “nxit urrejtje ndëretnike në një mjedis shumëkombësh. “, dhe se filmi tjetër nuk mund të shfaqet derisa të hiqen nga materiali simbolet shtetërore të Republikës së Kosovës – thotë deputeti.
Këto vendime gjyqësore, siç tha ai, në vetëm pak ditë treguan se si legjitimohet ksenofobia antishqiptare, e instaluar në të gjitha instancat e shtetit serb.
“Urrejtja e hapur dhe institucionale ndaj të tjerëve është një gjë e përditshme që e kultivojnë institucionet shtetërore në Serbi”, ka shkruar ai.
Gjatë asaj kohe, shton ai, autoritetet serbe po ndërtojnë një kulturë të mohimit të krimeve të luftës dhe lavdërimit të kriminelëve të luftës.
– Të njëjtat institucione promovojnë dhe ushqejnë ksenofobinë në programet e televizionit shtetëror, prej vitesh kanë ndërtuar një kulturë të mohimit të krimeve të luftës dhe glorifikimit të kriminelëve të luftës. Policia po ruan pikturat murale të kriminelëve të dënuar nga Gjykata Ndërkombëtare e Krimeve të Luftës. Përmes projektit “Bota Serbe” vazhdojnë politikën e aspiratave territoriale ndaj Kosovës, Malit të Zi dhe Bosnjës – thotë Kamberi.