Shkruan: I. Jovanoviq
Bujanoc, 20. nëntor 2023. Në tribunën parazgjedhor të Partisë Përparimtare Serbe (PPS) të dielën në fshatin Llopardincë të Bujanocit, banorët e këtij fshati paraqitën një duzinë problemesh me të cilat po përballen me vite të tëra, por u tha që të veçojnë vetëm dy për të diskutuar zgjidhjen e tyre, ndaj banorët e Lopardincës kërkuan ndërtimin e rrjetit të kanalizimit dhe rinovimin e shkollës së fshatit.
Në tribunë morën pjesë kryetari i këshillit lokal të PPS-së Nenad Mitroviq, nënkryetari i partisë në Bujanoc Millovan Aleksiq dhe koordinatori i PPS për Lopardincë, Rakovc dhe Karadnik Nebojsha Kostiq.
Rreth tridhjetë fshatarë paraqitën problemet që ka fshati dhe kërkuan zgjidhjen e tyre. Po ashtu, ata kanë kërkuar nga Mitroviqi që të mbajë një takim me anëtarët e Bashkësisë Lokale të Llopardincës dhe ai, sipas kryetarit të Pushtetit Lokal Goran Kostiq, u ka premtuar atyre se do të përgjigjet sa më shpejt, duke kërkuar nga banorët lokal që të zgjedhin dy probleme që do të ishin prioritet.
-Kanalizimi është një nga problemet më të mëdha në fshatin tonë. Puset u shkatërruan, ne e morëm ujin për analiza dhe asnjë familje nuk ka ujë të mirë nga pusi. Një problem tjetër i madh është edhe shkolla, e cila është në gjendje katastrofike dhe për të gjitha këto e kemi njoftuar Mitroviqin dhe të tjerët – thotë Goran Kostiq për portalin tonë.
Sipas Kostiqit, shkolla fillore, ku vijojnë mësimet rreth dyzet nxënës dhe parashkollorë, nuk ka mensë për të njëjtët nxënës, nuk ka fasadë, nuk është lyer për më shumë se dhjetë vjet, nuk ka rrethojë, pa ndriçim, pa sinjalistikë.
Përveç këtyre dy problemeve, të cilat, thotë ai, janë prioritet në fshat, komuniteti lokal nuk ka zyrë, nuk ka vend ku fshatarët të mblidhen dhe të diskutojnë problemet e tyre, të cilat Kostiq i konsideron të nevojshme.
Problem i madh është edhe transporti i fëmijëve që shkojnë në shkollën e mesme të Bujanocit. Për shkak të rikonstruksionit të shkollës së mesme “Sveti Sava”, mësimi zhvillohet në Fakultetin Ekonomik dhe pasdite, ndërsa nuk ka linjë për transportin e nxënësve për në Llopardnincë.
– Fëmijët detyrohen të bëjnë autostop kur kthehen në shtëpi pasdite dhe në mbrëmje, pasi disa orë mbarojnë në orën 21:20 dhe kjo është mënyra e vetme për të shkuar në shtëpi – shpjegon Kostiq.
E radhës në serinë e problemeve është aktivizimi i klubit futbollistik “Treshnjevka”.
– Për të aktivizuar KF “Treshnjevka”, e cila ka kohë që është mbyllur, dhe ishte krenaria dhe gëzimi i fshatit, duhet të sjellim rrymë në stadium që të mbarojmë dhomën e zhveshjes që kemi filluar. Si do të luajnë lojtarët nëse nuk kanë zhveshtore – thotë Kostiq.
Në Llopardincë së fundmi janë asfaltuar dy rrugë me gjatësi prej 950 metrash, ndërsa financues i projektit është Qeveria e Serbisë përmes Trupit Koordinues për Bujanoc, Preshevë dhe Medvegjë. Megjithatë, problemi që lind tani është se një nga rrugët e reja nuk ka ndriçim.
– Jemi mirënjohës që i kemi marrë ato dy rrugë, por duhet të vendoset edhe ndriçimi. Përveç kësaj, tre-katër rrugica të fshatit nuk kanë as shtylla – shton Kostiq.
Në fund, banorët lokal kërkuan asfaltimin e rrugës nga Llopardinca deri në Rakoc, e cila është rreth 2.5 kilometra e gjatë, por u është thënë se kjo kërkesë u hodh poshtë që në fillim.