Shkruan: N. Stevanoviq
Bujanoc, 14. dhjetor 2023. Me angazhimin e disa mësimdhënësve dhe prindërve të nxënësve të gjimnazit “Sveti Sava”,që udhëtojnë nga fshatrat e komunës, është zgjidhur përkohësisht problemi i transportit të fëmijëve në shkollë, mëson portali ynë në këtë shkollë të Bujanocit.
Në fund të nëntorit, prindërit paralajmëruan se nuk do t’i lejojnë më fëmijët e tyre të shkojnë në shkollë, sepse nuk kanë transport pasi që “Kavim Jedinstvo” anuloi linjat, duke i lënë nxënësit në mëshirën e fatit.
Më pas, siç mësojmë, ata u vetorganizuan përtej atyre nga të cilët kërkuan ndihmë – drejtorisë së shkollës dhe Komunës së Bujanocit. Përpjekjet dhanë fryte dhe fëmijët tani po barten me transportues të tjerë privatë.
Për këtë aranzhim ishte e nevojshme edhe përfshirja e shoqatave lokale të qytetarëve, të cilat u erdhën në ndihmë prindërve dhe nxënësve.
Megjithatë, është një zgjidhje afatshkurtër – vetëm deri në fund të gjysmës së parë të vitit, pra deri në fund të këtij muaji.
Bujanovaçke sot u përpoq pa sukses të mësojë nga drejtoresha Svetlana Manasijeviq se sa është arritur në rrugën e zgjidhjes sistematike dhe përfundimtare, të cilën prindërit kanë të drejtë ta presin nga drejtoria e shkollës, por edhe nga vetëqeverisja lokale.
Drejtoresha nuk kontaktoi me portalin tonë deri në publikimin e tekstit, kështu që pyetja se si do të udhëtojnë fëmijët e fshatit në shkollë në gjysmën e dytë të vitit mbeti pa përgjigje.