Shkruan: N. Stevanoviq
Bujanoc, 9. shkurt 2024. Deputeti i Bujanocit Shaip Kamberi dhe kryetari i Këshillit Kombëtar të Shqiptarëve (KKSH) Nevzad Lutfiu janë takuar të enjten në Prishtinë me nënkryetarin e Qeverisë së Kosovës, Besnik Bislimi, pas së cilës kreu i KKSH-së ka njoftuar se së shpejti do të shpërndahet 3 milionë euro që Kosova ka paraparë për shqiptarët në Bujanoc, Preshevë dhe Medvegjë.
Lutfiu thotë se e ka siguruar Bislimin se do të sigurohet që çdo cent nga fondi për shqiptarët e Luginës së Preshevës, siç i quan ai zona e tri komunave në jug të Serbisë, të shkojë në vendin e duhur.
Bujanovaçke më herët ka shkruar se qeveria në Prishtinë ka rritur për 50 për qind shumën e dedikuar për shqiptarët në Serbi në krahasim me vitin e kaluar.
Shpërndarja e parave të Kosovës në vitin 2023 u karakterizua me akuza ndaj Partisë për Veprim Demokratik (PVD), e cila drejtonte KKSH-në, për abuzime dhe korrupsion.
Deputeti Kamberi pas takimit njoftoi se Bislimit ia ka shprehur shqetësimin e tij për “qasjen diskriminuese të Qeverisë së Serbisë ndaj shqiptarëve në Preshevë, Bujanoc dhe Medvegjë”.
“Zvogëlimi i buxhetit të Këshillit Kombëtar të Shqiptarëve për një milion dinarë është i papranueshëm dhe është e papranueshme qasja e drejtorit të Shtëpisë së shëndetit në Preshevë, i cili refuzon të punësojë 40 punëtorë shëndetësorë vetëm për shkak të nacionalitetit të tyre”, tha Kamberi.
Ai ka shtuar se ka kërkuar mbështetjen e qeverisë së Kosovës në kërkesat legjitime të shqiptarëve në jug të Serbisë.