Shkruan: N. Stevanoviq

Bujanoc, 5. mars 2024. – Ndonëse zgjedhjet lokale nuk janë shpallur ndërsa data e mbajtjes së tyre ende mbetet në nivel të spekulimit, është më se e sigurt se ashtu siç janë aktualisht, partitë serbe do të marrin pjesë në to, të paktën në dy blloqe politike. Sasha Arsiq, lideri lokal i Lëvizjes popullore të Serbisë (LPS) për Bujanoc, thotë se “nuk i shkon mendja” të shkojë në zgjedhje së bashku me SNS-në dhe SPS-në, ndaj ftoi në takim përfaqësuesit e të gjitha partive opozitare aktive në Bujanoc: POKS, DSS e Re dhe Ne – Zëri i popullit. Ai thotë se të gjithë kanë rënë dakord të takohen dhe të bisedojnë të premten (8 mars) në ambientet e LPS-së.

Tema e takimit, natyrisht, është mundësia e pjesëmarrjes së përbashkët në zgjedhjet e ardhshme lokale. Kjo praktikisht do të thotë se partitë serbe nuk do të performojnë nën të njëjtën çati teksa Arsiq në deklaratën e tij për Bujanovaçke përsërit se ai dhe partia e tij me siguri nuk do të jenë pjesë e koalicionit të udhëhequr nga SNS dhe SPS. Liderët e këtyre partive nga Bujanoci, Nenad Mitroviq dhe Stojança Arsiq, të hënën mblodhën sërish përfaqësuesit e korpusit politik serb, me mungesën e dukshme të Sasha Arsiqit dhe Goran Kostiq Mekicës, përfaqësues i lëvizjes Ne – zëri i popullit.

Ideja është që të prezantojmë programin tonë zgjedhor para përfaqësuesve të tjerë të opozitës dhe të shohim nëse ata duan të shkojnë në zgjedhje me ne. LPS sigurisht që nuk do t’i bashkohet koalicionit të udhëhequr nga SNS dhe SPS, edhe pse socialistët përfaqësohen nga babai im, thotë Arsiq.

Siç shpjegon ai, baza e programit të partisë së tij është zgjidhja e problemeve urgjente të të gjithë banorëve të Bujanocit, si deponia, derdhjet e ujërave të zeza në Moravën jugore, furnizimi me ujë në zonat serbe, papunësia, por edhe shpërndarja e pabarabartë e buxhetit komunal.
Në vend që të asfaltojmë, apo siç është rasti i ngritjes së kryqeve, duhet të ndërtojmë një “balon” sallash sportive nëpër fshatra që të rinjtë të marrin të paktën një motiv për të qëndruar këtu, sepse edhe po të ndërtonim fabrika më vonë nuk do të kishte kush të punonte në to. Së dyti, qëllimi është që në pozita udhëheqëse të vijnë kuadro profesionale dhe jo partiake, thotë Arsiq.

Në të dyja takimet e organizuara nga SNS dhe SPS morën pjesë përfaqësues të organizatës serbe “Sabornost”, të cilët njoftuan se do të marrin pjesë në zgjedhje me emër tjetër si grup qytetarësh. Megjithatë, ata nuk janë në listën e të ftuarve të Arsiqit për të premten.

– Nuk e kam të qartë nëse janë shoqatë qytetarësh apo lëvizje politike?! Ata në fillim thanë se nuk kanë ambicie politike dhe se qëllimi i tyre i vetëm ishte bashkimi i serbëve të Bujanocit, por tani po tregojnë tjetër histori dhe planifikojnë të marrin pjesë në zgjedhje. Duhet të kishin thënë që në fillim se qëllimi i tyre është të marrin pjesë në zgjedhje. Siç është, i konsideroj të paqëndrueshme dhe nuk besoj se i dërgojnë mesazh të mirë qytetarëve, prandaj nuk i kemi ftuar as në mbledhjen e opozitës, sqaron Arsiq.