Bujanoc, 6. mars 2024. (Foto Indeksonline) – Një burrë (69) nga Ferizaji ka humbur jetën të martën në mbrëmje pasi dyshohet se ka rënë në lumin Morava, nga ana e Kosovës, në afërsi të vendkalimit Dheu I Bardhë afër fshatit Konçul, të komunës së Bujanocit.
Zëdhënësi i policisë për rajonin e Gjilanit, Ismet Hashani, ka thënë se dyshohet se viktima ka rënë në lumë aksidentalisht.
“Sipas informacioneve të para, i ndjeri së bashku me djalin dhe vajzën e tij janë larguar me veturë në drejtim të vendkalimit të Dheut të Bardhë. Në një parking pranë vendkalimit, ai iu afrua lumit në të cilin besohet se ka rënë aksidentalisht. Të gjitha njësitë relevante janë informuar dhe po merren me këtë rast”, ka thënë Hashani, transmeton Koha e Prishtinës.
Për rastin është njoftuar prokurori i shtetit, i cili ka urdhëruar që trupi i pajetë të dërgohet në Institutin për Mjekësi Ligjore, ndërsa rrethanat e rastit janë duke u hetuar nga policia rajonale në Gjilan.