Shkruan: N. Stevanoviq
Bujanoc, 15. prill 2024. Përfaqësuesit politikë të shqiptarëve në Bujanoc dhe Preshevë sërish kanë udhëtuar drejt Shteteve të Bashkuara të Amerikës, me qëllim që, siç thotë deputeti Shaip Kamberi, të sigurojnë mbështetje për Luginën e Preshevës në Senat dhe Kongres.
Delegacioni, i cili prej të dielës ndodhet në Amerikë, përbëhet nga deputeti Shaip Kamberi, kryetari i Komunës së Bujanocit Nagip Arifi, këshilltarja e kryeministrit të Kosovës – Ardita Sinani nga Presheva dhe Ragmi Mustafi, ish-kryetar i Këshillit Kombëtar të Shqiptarëve, e tani këshilltar i nënkryetarit të Qeverisë së Kosovës, Besnik Bislimi.
Vizita, bisedimet dhe të gjitha aktivitetet organizohen sërish nga organizata lobuese Liga Qytetare Shqiptaro-Amerikane, e drejtuar nga ish-kongresmeni Joe DioGuardi.
– Për këtë organizatë temë kryesore janë Bujanoci, Presheva dhe Medvegja. Diskriminimi i shqiptarëve nga Serbia e Vuçiqit është ajo me të cilën merren. Shtypja sistematike e banorëve të Luginës së Preshevës do të shënohet në Senat dhe Kongres – tha Kamberi nga Amerika.
Siç tha ai, shqiptarët duhet ta fitojnë betejën për mbështetjen e Luginës së Preshevës nga Shtetet e Bashkuara të Amerikës në Kapitol Hill.
– Të fitojmë betejën me Serbinë e Vuçiqit në Evropë. Tashmë kemi mbështetjen publike të senatorëve amerikanë Joni K. Ernst dhe Gary Peters që “Serbia të ndalojë çdo formë diskriminimi, veçanërisht pasivimin e adresave të shqiptarëve” në Preshevë, Bujanoc dhe Medvegjë. Kemi edhe mbështetjen publike të kongresmenëve amerikanë Jim Hymes dhe Richie Torres, të cilët kërkuan “reciprocitet në të drejtat e shqiptarëve në Luginën e Preshevës me serbët në Kosovë”, tha Kamberi.
Gjatë disa vizitave në Amerikë në dy vitet e mëparshme, politikanët shqiptarë u takuan me përfaqësues të Departamentit të Shtetit, kongresmenë dhe senatorë. Supozohet se një agjendë e ngjashme është planifikuar edhe për këtë vizitë.