Bujanoc, Prishtinë, 17. prill 2024. – Ministria e Punëve të Jashtme dhe Diasporës dhe Ministria e Punëve të Brendshme të Kosovës kanë publikuar deklarata ku u bëjnë thirrje qytetarëve të Kosovës dhe shqiptarëve që të shmangin “kalimin me çdo kusht nëpër Serbi” pas “situatës së krijuar në pikat kufitare në Serbi”, për shkak të, siç theksohet, ndalimit arbitrar të qytetarëve të Kosovës në pikat kufitare, shkruan gazeta online Reporteri.net.
„Ministria e Punëve të Jashtme dhe Diasporës dhe Ministria e Punëve të Brendshme njoftojnë se pas situatës së krijuar në pikat kufitare në Serbi dhe ndalimit arbitrar të qytetarëve të Kosovës në pikat kufitare, të gjithë bashkatdhetarët dhe qytetarët që janë në lëvizje të shmangin kalimet nëpër Serbi.
Bujanovaçke ka marrë informacione nga një mori përdoruesish të rrjeteve sociale të cilët kanë njoftuar se automjetet me targa RKS ndalohen në vendkalimet administrative dhe kufijtë në anën serbe.
„MPJ dhe MPB janë duke ndërmarrë veprimet e nevojshme dhe do t’ju informojnë për detaje të reja. Lusim të gjithë udhëtarët që të monitorojnë me kujdes situatën e tensionuar të sigurisë dhe të mos udhëtojnë nëpër Serbi. Duke qenë se qarkullojnë shumë lajme të rreme që synojnë përhapjen e frikës dhe kaosit, për lajmet më të fundit zyrtare në këtë drejtim ndiqni @Kosovo_Police ”, thuhet në njoftim.
Sekretari i Zyrës ndërlidhëse të Kosovës në Serbi, Fatmir Haxholli, ka thënë se në shenjë hakmarrjeje dhe nervozizmi absurd ndaj votimit të Asamblesë Parlamentare të Këshillit të Evropës, për anëtarësimin e Republikës së Kosovës në këtë institucion ndërkombëtar, autoritetet kufitare të Serbisë, në vendkalimin “Batrovci”, Serbi – Kroaci, që nga mesnata kanë bllokuar së paku katër autobusë me targa të Republikës së Kosovës me pasagjerë shtetas të Republikës së Kosovës.
“Në shenjë hakmarrjeje dhe nervozizmi absurd ndaj votimit të Asamblesë Parlamentare të Këshillit të Evropës, për anëtarësimin e Republikës së Kosovës në këtë institucion ndërkombëtar, autoritetet kufitare të Serbisë, në vendkalimin “Batrovci”, Serbi – Kroaci, që nga mesnata ka bllokuar së paku katër autobusë me targa të Republikës së Kosovës me pasagjerë të Republikës së Kosovës.“
Bllokimi i mbi 300 qytetarëve, mbajtja e pasaportave dhe dokumenteve të udhëtimit, është shkelje flagrante jo vetëm e marrëveshjeve të Brukselit, por edhe e të drejtave universale të njeriut të garantuara nga të gjitha konventat ndërkombëtare. Vetëm regjimet më autoritare bllokojnë udhëtarët nga një vend tjetër, me shpjegimin se “ky është një urdhër nga Beogradi”.
Duke qenë se Zyra Ndërlidhëse e Serbisë nuk komunikon me zyrën tonë, siç ishte rasti sot në mëngjes, kam kërkuar dhe pres një përcjellje për të udhëtuar në vendkalimin e Batrovcit për të takuar bashkëqytetarët tanë edhe në shenjë proteste kundër këtyre zhvillimeve. ” ka shkruar ai.