Bujanoc, 27. maj 2024. (Foto ilustrim) – Sipas të dhënave të regjistrimit, pritet që në Kosovë të ketë 1.600.000 banorë, tha në konferencën e fundit për media, ushtrues detyre i drejtorit të Agjencisë së Statistikave, Avni Kastrati.
Sipas tij, pjesëmarrja e komuniteteve joshqiptare ka qenë masive përveç komunave në veri. Të dhënat përfundimtare do të shpallen pas gjashtë muajsh, raporton RTS.
“Të gjitha komunitetet ishin të hapura për regjistrim dhe kërkuan që të regjistroheshin. Pjesëmarrja e të gjitha komuniteteve pakicë ishte masive, përveç komunitetit serb në katër komuna në veri të Kosovës, që pjesërisht morën pjesë”, tha Avniu.
Kastrati nuk ka dhënë një përgjigje të qartë për vërejtjet e gazetarëve se regjistruesit nuk i kanë regjistruar të gjitha amvisëritë dhe qytetarët në zonat me shumicë serbe, dhe se të interesuarit kanë mbetur të pa regjistruar, përveç se, siç tha ai, disa regjistrues kanë hequr dorë, transmeton radio KiM.
“Disa zona serbe janë vizituar nga tre herë nga regjistruesit edhe në javën e fundit. Qytetarët e serbë tashmë kanë tentuar të bashkohen sepse e kanë parë rëndësinë e regjistrimit, por gjatë këtyre pesë javëve nuk janë përgjigjur. Ky është një projekt regjistrimi dhe ASK-ja e ka bërë sa më mirë. Atyre iu dha mundësia të regjistrohen nga të gjitha komunat, pa dallim etnie. Ne bëmë të pamundurën që komuniteti serb të përgjigjet. Kishte shtatë qendra për t’u regjistruar. Jemi munduar që të plotësojmë kërkesat që na vijnë nga komunat tjera. Ata që nuk janë regjistruar këtë vit do të regjistrohen në vitin 2031”, tha Kastrati.
Ai tha se Agjencia e Statistikave kishte bashkëpunëtorë nga dy organizata joqeveritare në komunat me shumicë serbe, të cilët duhej të punonin në fushatë. Kastrati nuk është përgjigjur në pyetjen e gazetarit se cilat janë organizatat dhe sa para u janë vënë në dispozicion për fushatën.
Të dhënat paraprake për regjistrimin e popullsisë dhe amvisërive do të publikohen në fillim të korrikut, tha kreu i Agjencisë, duke shtuar se zyrtarët e Agjencisë së Statistikave do të punojnë edhe gjatë pushimeve.
Sipas pritshmërive të tij, të dhënat përfundimtare do të bëhen të ditura pas gjashtë muajsh.
Regjistrimi i popullsisë dhe ekonomive familjare në Kosovë filloi më 5 prill dhe përfundoi me një zgjatje për një javë, më 24 maj.
Sipas regjistrimit të vitit 2011, numri i përgjithshëm i banorëve në Kosovë ishte rreth 1.8 milionë, prej të cilëve rreth 25.000 ishin serbë. Megjithatë, sipas vlerësimeve të sektorit civil, në Kosovë jetojnë rreth 100,000 pjesëtarë të komunitetit serb.