Shkruan: N Stevanoviq
Bujanoc, 6. qershor 2024. – Fituesi i zgjedhjeve lokale në komunën e Bujanocit, opozita shqiptare e mbledhur në listën e Frontit për ndryshim, kërkon nga Komisioni Komunal i Zgjedhjeve (KKZ) të anulojë votimin në vendvotimin numër 10, fshati Konçul, për shkak të parregullsive të shumta. Në Konçul u regjistrua një pjesëmarrje rekord prej gati 80 për qind dhe nga 1112 vota të vlefshme, 1099 fitoi partia bastion i së cilës është në këtë fshat – Lëvizja për Progres Demokratik (LPD) e Shqiprim Musliut.
Falë rezultatit të pabesueshëm në Konçul, LPD u bë forca e dytë politike shqiptare për herë të parë pas zgjedhjeve të së dielës, duke dalë para Partisë për Veprim Demokratik të Shaip Kamberit dhe partisë së Nagip Arifit.
Njëri nga liderët e Frontit për Ndryshim, Arbër Pajaziti, ka konfirmuar se kjo listë ka bërë kundërshtim në komisionin zgjedhor dhe se pret një votim të ri në Konçul.
– Së bashku me ankesën tonë kemi bashkangjitur edhe një sërë argumentesh që paraqesin dëshmi të forta për parregullsitë që kemi hasur në këtë vendvotim – tha Pajaziti.
Sipas tij, parregullsitë e vërejtura në vendvotimin numër 10 duhet të parandalohen me çdo kusht në të ardhmen, sepse vetëm kështu mund të respektohet vullneti i lirë i qytetarëve.
– Ftojmë të gjithë anëtarët e KKZ-së që të votojnë për anulimin e zgjedhjeve. I bëj thirrje veçanërisht partive politike shqiptare që të ngrihen për mbrojtjen e votës së lirë dhe demokracisë. Përsëritja e ngjarjeve të tilla do të shënojë fundin e të gjitha proceseve të ardhshme zgjedhore. Metodat e tilla e humbin kuptimin e çdo lloj zgjedhjeje – tha Pajaziti.
Ai theksoi se gjatë votimit të përsëritur duhet të angazhohen të gjithë aktorët e procesit zgjedhor në vend, përfshirë edhe vëzhguesit ndërkombëtarë.
– Prokuroria dhe të gjitha organet e tjera ligjzbatuese duhet të përfshihen në hetimin dhe parandalimin e dukurive të tilla. Vjedhja e votës është si çdo vjedhje tjetër. Edhe shumë më keq – tha Pajaziti.
Krahas kërkesës për anulim të votimit në Konçul, sot Komisioni zgjedhor do të vendosë edhe për përsëritjen e votave edhe në tri vendvotime, për të cilat Bujanovaçke ka shkruar disa herë.
Rezultatet e votimit në Konçul, bastioni i partisë së Musliut, të dalë nga UÇPMB-ja, jozyrtarisht i kontestojnë pothuajse të gjitha partitë dhe jo vetëm në këto zgjedhje.