Shkruan: I. Jovanoviq
Bujanoc, 23 janar 2025. Është anuluar transporti i rregullt për nxënësit e Bujanocit. Për nxënësit e shkollës së mesme “Sveti Sava” në Bujanoc, të cilët jetojnë në fshatrat Zhuzelicë dhe Lilancë, nuk kanë mundësi të shkojnë në shkollë nga fillimi i gjysmëvjetorit të dytë, sepse kompania transportuese “Kavim – Jedinstvo” e ka anuluar linjën që transportonte nxënësit për në shkollë dhe nga shkolla. “Ajo linjë nuk është më rentabile për ne”, ishte e vetmja përgjigje që mori drejtoresha e shkollës Svetlana Manasijeviq.
-Linja është ndërprerë pa asnjë njoftim paraprak. Është një itinerar nga Bujanoci për në Lilancë dhe qarkullonte në dy ndërrime, në orën 13:20 kur fëmijët arrijnë në turnin e dytë dhe në 19:30 kur kthehen në shtëpi. Rreth dhjetë nxënës nga shkolla jonë udhëtojnë në atë linjë. Kam kontaktuar me shefin e stacionit të autobusëve në Bujanoc dhe kam pyetur pse është anuluar. Më tha se nuk ishte fitimprurëse për ta, sepse nuk kishin një numër të mjaftueshëm fëmijësh dhe nxënësish për të transportuar. Nuk kemi marrë asnjë shpjegim shtesë, as përgjigje në pyetjen nëse dhe kur do të rikthehet linja – tha të enjten drejtoresha Manasijeviq.
Ajo u shpreh e shqetësuar sepse siç thotë ajo, transporti duhet të jetë në dispozicion të çdo nxënësi, pavarësisht se nga vijnë.
-Prindërit erdhën për të pyetur se si do ta zgjidhnim problemin, gjë që është plotësisht e kuptueshme, sepse këto janë gjëra elementare. Si do të vijnë fëmijët tanë në shkollë dhe si do të kthehen në shtëpi, si do të kalojmë vitin e ardhshëm shkollor – thotë drejtoresha.
Për këtë çështje është interesuar edhe pushteti lokal. Nënkryetari i Komunës së Bujanocit, Aleksandar Millosheviq ka kontaktuar me përgjegjësit në “Jedinstvo”, por as ai nuk ka marrë përgjigje se pse është ndërprerë linja.
-Për këtë problem jam informuar nga drejtoresha e shkollës dhe kryetari i Bashkësisë Lokale Lilancë. Kam biseduar me drejtorin teknik në “Jedinstvo” të mërkurën dhe është marrë vesh që të kontrollojnë se çfarë po ndodh saktësisht dhe të më njoftojnë. Megjithatë, ende nuk kam marrë përgjigje – thotë Millosheviq.
Kjo nuk është hera e parë që nxënësit e Bujanocit nuk kanë transport për në shkollë, për të cilën portali ynë ka raportuar rregullisht.