Za albansku decu - Enkel Redžepi

MINISTRIA BLLOKON KKSH-në, REXHEPI THOTË SE SHTETI PO I NDËSHKON SHQIPTARËT

Bujanoc, 4 shkurt 2025. – Ministria e të Drejtave të Njeriut dhe Dialogut Social refuzoi regjistrimin e Enkel Rexhepit si kryetar të ri të Këshillit Kombëtar të Shqiptarëve (KKSH), me shpjegimin zyrtar se afati ishte tejkaluar. Rexhepi vlerëson se ky është edhe një akt i diskriminimit dhe armiqësisë ndaj shqiptarëve dhe një “ndëshkim politik”. Siç thotë ai, qëllimi është shkatërrimi i autonomisë institucionale të shqiptarëve në Serbi. Rexhepi, si kandidat i PVD-së, zëvendësoi Nevzad Lutfiun nga LPD-ja në krye të KKSH-së, bazuar në marrëveshjen e palëve për udhëheqjen e këtij institucioni për dy vjet.
Ministria e mori vendimin më 28 janar ndërsa një ditë më parë anuloi vendimin e KKSH-së për të subvencionuar fermerët shqiptarë me para nga buxheti i Kosovës.
Rexhepi dënon të dyja vendimet e Ministrisë:
– Këto lëvizje janë shembuj të qartë të politikës diskriminuese të shtetit serb ndaj shqiptarëve, të cilët vazhdojnë të përballen me represion politik dhe izolim ekonomik. Vendimi për fermerët është ligjërisht i pabazuar dhe qartësisht i motivuar politikisht, me qëllim që shqiptarët e Luginës të jenë të izoluar, të varfër dhe të privuar nga ndihma ndërkombëtare, thotë Rexhepi.
Për refuzimin e regjistrimit të tij si kryetar i KKSH-së, ai thotë se Ministria, duke përdorur teknika absurde burokratike, saboton punën e institucionit që ai drejton.
– Pretendimi se kandidatura për kryetar nuk është paraqitur brenda afatit të caktuar është një alibi e pastër politike, e përdorur për të paralizuar funksionimin e KKSH-së. Kjo qasje e hapur diskriminuese dëshmon se Serbia nuk ka ndërmend të respektojë të drejtat e pakicave, por synon të kontrollojë dhe dobësojë çdo institucion shqiptar që përpiqet të funksionojë në përputhje me ligjin dhe të mbrojë të drejtat e komunitetit të saj. Ky është një sulm i koordinuar politik dhe institucional ndaj shqiptarëve të Luginës, tha Enkel Rexhepi.
Siç theksoi ai, të dyja vendimet, së bashku me pasivizimin e adresave, margjinalizimin ekonomik dhe ndalimin e përdorimit të gjuhës shqipe, janë pjesë e një strategjie më të gjerë të shtetit serb për të eliminuar çdo përpjekje për zhvillimin dhe përfaqësimin e shqiptarëve në Serbi.
Rexhepi paralajmëron se KKSH do të bëjë padi në Gjykatën Administrative kundër vendimit të Ministrisë dhe se për çdo gjë do të informojë institucionet ndërkombëtare.




Leave a Reply

Your email address will not be published. Required fields are marked *