Bujanoc, 15. shtator 2023. Mesatarja e pagës minimale për vitin 2024 do të jetë më e lartë për 17.8 për qind, pra çmimi minimal i punës, pa taksa dhe kontribute për sigurimet e detyrueshme shoqërore, do të jetë 47.154 dinarë.
Qeveria e Serbisë të enjten ka miratuar vendimin për nivelin e pagës minimale për periudhën janar-dhjetor 2024. Ai, pa taksa dhe kontribute për sigurimet e detyrueshme shoqërore, do të rritet në 271 dinarë për orë pune për vitin e ardhshëm dhe do të arrijë në 47.154 dinarë, pra mesatarisht rreth 401 euro në muaj.
Siç thuhet nga Qeveria, kjo është një rritje prej 17.8 për qind dhe dukshëm mbi mesataren e pritshme të inflacionit prej 4.9 për qind në vitin 2024, gjë që do të ndikojë në afrimin më të shpejtë dhe më domethënës të pagës minimale ndaj shportës minimale të konsumit.
Paga minimale mesatare në vitin 2023 ishte rreth 40 mijë dinarë. Sindikatat kërkuan që paga minimale të rritet me të paktën dhjetë për qind këtë vit nga shtatori dhe me rreth 20 për qind vitin e ardhshëm.
Negociatat për rritjen e pagës minimale për vitin e ardhshëm, sipas procedurës ligjore, kanë nisur në mes të gushtit dhe duhet të përfundojnë brenda datës 15 shtator. Në rast se nuk arrihet një marrëveshje ndërmjet partnerëve socialë të shtetit, sindikatave dhe punëdhënësve, çmimi minimal i punës përcaktohet nga shteti.