Shkruan: I. Jovanoviq
Bujanoc, 3. qershor 2024. – Për shkak se zgjedhjet do të përsëriten në disa vende, koalicioni rreth SNS-së nuk do të diskutojë me askënd për momentin për formimin e shumicës në Kuvendin Komunal të Bujanocit, tha për portalin tonë Nenad Mitroviq, lideri i kësaj partie në Bujanoc. Ai shtoi se është i kënaqur me numrin e votave dhe falënderoi të gjithë votuesit që votuan për listën zgjedhore “Aleksandar Vuçiq – Bujanoci nesër”, sepse, siç thotë ai, pranuan se duhet të vazhdohet me vazhdimësinë në punën dhe zhvillimin e mëtutjeshëm të qytetit.
“Rezultatet e zgjedhjeve ende nuk janë zyrtare sepse kemi përsëritje të zgjedhjeve në tri vendvotime, në Muhoc dhe në dy vende të tjera në qytet, kështu që gjithçka është ende jozyrtare derisa të përfundojë votimi në dhjetë ditët e ardhshme”, thotë Mitroviq.
Siç thotë ai, është i kënaqur me rezultatet aktuale.
– Në këto zgjedhje dolën rreth 6000 serbë dhe ne fituam 50 për qind të votave. Dëshiroj të falënderoj të gjithë votuesit që votuan për listën tonë zgjedhore. Falënderojmë edhe ata që nuk na votuan, nuk kemi të drejtë të zemërohemi me ata njerëz, por duhet të shohim se cila është pakënaqësia e tyre dhe si dhe në çfarë mënyre mund t’i ndihmojmë ta tejkalojnë atë pakënaqësi – thotë Mitroviq.
I pyetur se si e komenton faktin që SNS dhe SPS kanë marrë rreth 3600 vota më pak se në zgjedhjet e mëparshme në vitin 2020, Mitroviq përgjigjet:
– Ky është rezultat i rishpërndarjes brenda bllokut serb dhe nuk ka asnjë dilemë, votuesit janë të lirë të zgjedhin se për kë do të votojnë. Është e rëndësishme që sa i përket numrit të mandateve në Kuvend, serbët kanë një mandat më shumë në krahasim me zgjedhjet e kaluara, ne kemi 8, GG Dejan Stojanoviq 5 dhe Sasha Arsiq 1, që është 14 mandate ndërsa në mandatin e mëparshëm kishim qenë 13.
Ai ende nuk dëshiron të komentojë nëse pret ftesë për formimin e qeverisë në Bujanoc nga ndonjë parti shqiptare.
– Derisa të mbarojnë zgjedhjet nuk do të ketë negociata, sepse vetëm pas përfundimit të procesit zgjedhor do të kemi numrin e saktë të mandateve të këshilltarëve dhe mendoj se bisedimet do të vijojnë vetëm pas kësaj, pra do të shohim nëse do të ketë në periudhën e ardhshme – thotë Mitroviq për portalin tonë.
Kujtojmë se sipas rezultateve jozyrtare dhe të përkohshme të Komisionit Komunal të Zgjedhjeve, partitë që mbledhin serbët në Bujanoc edhe pas këtyre zgjedhjeve të së dielës mund t’i mbajnë 13 mandatet aktuale në parlamentin lokal, ndërsa aktualisht kanë 12 të garantuara.
Sipas të njëjtit burim, fitues i zgjedhjeve lokale në Bujanoc është Fronti për Ndryshim (FpN) i Arbër Pajazitit, Driton Rexhepit dhe partisë UDSH, me 3371 vota (19,17%) dhe do të ketë 8 këshilltarë në parlamentin e ardhshëm. Po aq mandate do të ketë edhe Lëvizja për Progres Demokratik (LPD) e Shqiprim Musliut, e cila fitoi 3083 vota (17,53) e renditur e dyta. I treti më i fortë është koalicioni rreth SNS “Aleksandar Vuçiq-Bujanovaci nesër” me 2899 vota (16,49%) dhe 7 ulëse në Kuvendin lokal.