Shkruan: I. Jovanoviq
Bujanoc, 12 shtator 2024. – Kryetarja e Sindikatës së punonjësve arsimor “Nezavisnost” për rrethin e Pçinjës dhe Jabllanicës, gjegjësisht për rajonin e Drejtorisë shkollore të Leskocit, Suzana Lazareviq Stoilkoviq, fton të gjithë punonjësit arsimor që i përkasin kësaj Drejtorie shkollore të vijnë në një tubim të madh protestues i cili është caktuar për të hënën në Vranjë (16 shtator) para DSH Leskoc, nga ora 12.00.
– Tubimi po organizohet për shkak të mosplotësimit të kërkesave nga Protokolli i nënshkruar me Qeverinë e Republikës së Serbisë. Dje ishte takimi i fundit dhe na ofruan disa gjëra që nuk ishin fare në protokoll, kështu që ne nuk pajtohemi me këtë – shpjegon Lazarevic Stoilkoviq, mësuese në kopshtin e fëmijëve në Bujanoc.
Nuk bëhet fjalë vetëm për pagën, shton ajo, por për katër kërkesa që nuk janë plotësuar.
– Gjithë verën shkuam në negociata, por gjithçka mbeti vetëm në disa premtime të rreme, dhe tani na rezulton se thjesht na mashtruan – thotë bashkëbiseduesja jonë.
E pyetur nëse punëtorët e kopshtit “Gëzimi ynë” do t’i bashkohen protestës, Lazareviq Stoilkoviq përgjigjet:
– Në këtë protestë do të marrin pjesë vetëm shkollat, niveli ynë arsimor nuk do të marrë pjesë zyrtarisht tani, por ne japim mbështetjen tonë të plotë. Kjo duhet të pasohet nga një tubim i madh në Beograd në fillim të tetorit dhe më pas në protestë do të marrin pjesë institucionet parashkollore nga e gjithë Serbia.
Në protestë marrin pjesë Unioni i sindikatave të punonjësve arsimor të Serbisë, GSPRS Nezavisnost dhe Sindikata e punonjësve arsimor të Serbisë, ndërsa kërkesat e këtyre sindikatat janë si më poshtë:
Që në pajtim me marrëveshjen me Qeverinë e Republikës së Serbisë, ndryshimet e propozuara në Kodin Penal të diskutohen publikisht dhe të miratohen nga Kuvendi i Republikës së Serbisë me procedurë urgjente.
Që paga fillestare e mësimdhënësit, gjegjësisht e punonjësit me shkallë të shtatë, dhe në përputhje me Protokollin e nënshkruar me Qeverinë e Republikës së Serbisë, në janar 2025 të jetë e barabartë me pagën mesatare në Republikën e Serbisë.
Që deri në fund të vitit 2024, në konsultim me sindikatat përfaqësuese, të ndryshohet Rregullorja për koeficientët për llogaritjen dhe pagesën e pagave të punonjësve në shërbimet publike.
T’u japë punonjësve në arsim një shpërblim të Vitit të Ri në përputhje me Kontratën e Posaçme Kolektive.