Shkruan: Mjaltina Ferati
Fenomeni i migrimit në masë të madhe ka prekur edhe Presheven, sidomos të rinjtë e kësaj komune. Bazuar me biseda të cilat i zhvilluam me grupmosha të tilla, vihet në përfundim se shkaqet kryesore që i detyrojnë ata të mendojnë rreth braktisjes së vendlindjes janë mundesitë e vogla dhe mungesa e perspektivës në këtë zonë.
Aulona, 17 vjeçe, është e mendimit se kushtet joadektuate për arsimim e pastaj edhe mundësitë minimale për punësim, detyrojnë bashkëmoshatarët e saj për të shqyrtuar mundësinë e migrimit.
Edhe përkundër dëshirës së madhe për të qëndruar në vendlindje, ajo nuk sheh ndonjë optimizëm të theksuar se gjërat do të marrin kahje pozitive.
Bashkëbiseduesit tjerë theksojnë se kjo komunë ka potencial të lartë për zhvillim, por që fatkeqësisht mbetet i pa shfrytëzuar.
Arijaniti, një 16 vjeçar, e sheh zhvillimin e turizmit si hap drejt rimëkembjes ekonmike.
“Ky rajon ka shumë elemente për avancimin e turizmit ngase këtë ia mundëson pozita gjeografike, por edhe vet klima e përshtatshme.
Turizmit malor edhe ai rural mund të sjellin fitime për shumë familje dhe kështu të kontribojnë në mirëqenien e përgjithshme” thotë ai.
Shumë të rinj tjerë e shohin nevojën e investimeve shtetërore si prioritare për zhvillimin e komunës së Preshevës, e që në të njëjtën kohë do të thoshte ndalim i migrimit të mëtejmë.
Për Egzonin, një student i ekonomisë, investimet e huaja do të nënkuptonin hapjen e fabrikave dhe vendeve të reja të punës dhe do të lidhnin të rinjtë për vendin ku ata jetojnë.
Marrë në përgjithësi, të rinjtë e Preshevës, fenomenin e migrimit e shohin më tepër si detyrim se sa dëshirë, ndërsa apelojnë tek më të vjetrit që ata të kontribuojnë që gjeneratave të reja ti sigurohen perspektiva për të mosbraktisur vendlindjen.
Praktika gazetareske u mbështet si pjesë e projektit “Fuqizimi i të rinjve shqiptarë dhe përmirësimi i integrimit në shoqërinë serbe” zbatuar nga Nismat Qytetare, dhe financuar nga Qeveria e Mbretërisë së Bashkuar të Britanisë së Madhe dhe Irlandës së Veriut përmes Fondit për Konflikt, Stabilitet dhe Siguri (CSSF). Për përmbajtjen e tij përgjegjës ekskluziv janë Grupi 484 dhe Portali Bujanovaçke e që nuk pasqyron domosdoshmërisht pikëpamjet e Qeverisë së Mbretërisë së Bashkuar të Britanisë së Madhe dhe Irlandës së Veriut apo Nismave Qytetare.
PRAKTIKË GAZETARIE NË REDAKSINË E BUJANOVAÇKES PËR NXËNËSIT E SHKOLLAVE TË MESME
