Shkruan: N. Stevanoviq
Bujanoc, 8 janar 2025 (foto screenshot Behluli FB) – Bllokimi i rrugës kryesore në qendër të Bujanocit, përballë komunës, gjatë festës së Krishtlindjes, nuk është diçka për të protestuar apo për panik, u tha shqiptarëve Nexhat Behluli, punëtor medial dhe biznesmen nga Bujanoci.

– Qetësohuni, gjithçka është normale, nganjëherë edhe ne bllokojmë trafikun – thotë Behluli.

Bllokimi i rrugës në qendër të qytetit ka ndodhur të hënën, ndërsa e kanë shkaktuar serbët që po ktheheshin nga prerja e pemëve të Krishtlindjeve. Kjo ka shkaktuar pakënaqësi te disa shqiptarë, pas së cilës ka reaguar Behluli.

– Qetësohuni, gjithçka është normale. Kjo është një video e momentit kur serbët bllokuan rrugën në qendër të qytetit gjatë festës së Krishtlindjes, dhe policia ishte aty për të rregulluar trafikun. Nuk ka asgjë për t’u shqetësuar, serbët kanë festën e tyre para Krishtlindjeve. Shkojnë në mal dhe presin degë dushku, se është ritual feste, por pastaj pinë edhe raki dhe paksa eksitohen. Kalon shpejt. Unë i njoh shumicën e këtyre djemve, i njoh edhe prindërit e tyre, disa bashkëpunojnë me shqiptarët, disa u shesin dru shqiptarëve. Kjo është euforia e tyre momentale dhe asgjë e rëndë dhe e tmerrshme nuk ka ndodhur – tha Behluli.

Bllokimi i rrugës për Krishtlindje në Bujanoc – te Komuna

Siç tha ai, edhe kur shqiptarët bëjnë dasma në verë, rrugët në qytet janë të bllokuara dhe çdo gjë kalon pa incidente.

– Këtu në Bujanoc jetojmë bashkë me serbët, duhet të jemi tolerantë për festat e njëri-tjetrit. Kështu vazhdon jeta – tha Behluli.

Festimi i Krishtlindjes ka një traditë shumë dekadash në mesin e bujanocasve, për të cilën portali ynë ka shkruar disa herë.