Bujanoc, 15 mars 2024. (Foto Kosovo online) – Çështja e dinarit në Kosovë është një çështje urgjente, humanitare që duhet të zgjidhet menjëherë, tha i dërguari special i Amerikës për Ballkanin Perëndimor, Gabriel Escobar, pas takimit dje në Prishtinë me kryeministrin e Kosovës, Albin Kurti.
Escobar ka theksuar se vendimi i Bankës Qendrore të Kosovës për ndalimin e dinarit ka shkaktuar vështirësi për komunitete të caktuara në Kosovë, për këtë arsye SHBA-të janë shumë të shqetësuara.
– Ne do të vazhdojmë të punojmë për këtë çështje, por mendoj se kjo është një çështje urgjente humanitare që duhet të zgjidhet menjëherë. Shpresoj që qeveria të jetë e gatshme të jetë fleksibile në vazhdimin e dialogut, i cili është caktuar për të martën – tha i dërguari amerikan, transmeton Kosovo Online.
Ai vlerësoi qeverinë për vendimin e saj në lidhje me manastirin e Deçanit.
– Ishte një vendim i vështirë, por i duhur. E përgëzoj angazhimin e tij për zbatimin e shtetit ligjor dhe vendimin e marrë nga Gjykata Kushtetuese – tha Escobar.
Sipas tij, raporti i SHBA-së ndaj Kosovës nuk është i pabalancuar.
– Gjithçka që bëmë vitin e kaluar, e bëmë për Kosovën. Menjëherë pas Ohrit, ne përkrahëm kandidaturën e Prishtinës për Këshillin e Evropës dhe proceset demokratike, përfshirë zgjedhjet në veri. I qëndruam përkrah Kosovës pas ngjarjeve të shtatorit dhe arritëm deri në atë pikë që t’ju sigurojmë ‘Javelins’. Andaj na e sqaroni se si qëndrimet tona qenkan jo të balancuara.