ARDITA SINANI: PËRFAQËSUESIT E SHBA-së DHE BE-së VAZHDOJNË ME INJORIMIN E SHQIPTARËVE TË BUJANOCIT DHE PRESHEVËS

Bujanoc, 18. Mars 2024. Ardita Sinani, politikane nga Presheva dhe këshilltare e kryeministrit të Kosovës, Albin Kurti, ka kritikuar të dërguarin amerikan për Ballkanin Perëndimor dhe të dërguarin e Bashkimit Evropian, Miroslav Lajçak, se nuk janë takuar ende me përfaqësuesit e zgjedhur të shqiptarëve në Republikën e Serbisë.
“Takimi i fundit me përfaqësuesit e serbëve nga veriu i Kosovës është i kuptueshëm duke pasur parasysh zhvillimin e ngjarjeve, por është e pakuptueshme që ende nuk ka takim me përfaqësuesit e shqiptarëve nga Lugina e Preshevës”, thotë Sinani.
Sipas saj, kjo dërgon mesazhe të gabuara për qarqet që promovojnë destabilizimin e situatës së sigurisë në Ballkanin Perëndimor.
“Shqiptarët në Luginën e Preshevës në veçanti dhe në Serbi në përgjithësi, si komunitet pakicë, mbeten të diskriminuar dhe të shtypur. Kjo është konfirmuar prej dekadash nga raporte të ndryshme zyrtare të administratave të Bashkimit Evropian dhe SHBA-së”, thotë Sinani.
Ajo shtoi se është kundërproduktive përfshirja e çështjes së komunitetit pakicë serb në Kosovë në procesin e normalizimit të marrëdhënieve ndërmjet Kosovës dhe Serbisë, pa përfshirjen e çështjes së komunitetit shqiptar në Serbi.
“Prandaj, zoti Escobar dhe zoti Lajçak, ju ftoj të takoheni me të zgjedhurit e shqiptarëve në Serbi, së paku t’i dëgjoni”, tha politikania nga Presheva.