Shkruan: N. Stevanoviq
Bujanoc, 27 mars 2024. Këshilli Kombëtar i Shqiptarëve (KKSH) formoi një komision për vlerësimin e projekteve në fushën e arsimit që do të aplikojnë për para nga qeveria e Kosovës. Pas konkursit të vitit të kaluar dhe shpërndarjes së diskutueshme të milionave të Kosovës për shqiptarët në Bujanoc, Preshevë dhe Medvegjë, që shkaktoi akuza për korrupsion dhe keqpërdorime, presidenti i KKSH-së, Nevzad Lutfiu, njofton se procesi i këtij viti “do të jetë tërësisht transparent ”.
Lutfiu thotë se anëtarët e komisionit për projekte arsimore janë zgjedhur unanimisht në mbledhjen e këshillit.
Në komision janë Gafurr Hiseni – drejtor i shkollës në fshatin Miratoc, për të cilin Lutfiu thotë se është model në arsim, pastaj Arsim Krasniqi – profesor i kimisë, Adelina Hasani, profesoreshë e gjuhës shqipe, Merita Behluli – profesoreshë e gjuhës shqipe, Bujar Mustafa – profesor i lëndëve ekonomike, Ajshe Suleimani – psikologe, Flakron Isufi – mësues.
KKSH ka caktuar gjithashtu një komision që do të shqyrtojë ankesat.
Qeveria në Prishtinë ka paraparë 3 milionë euro për shqiptarët e Bujanocit, Preshevës dhe Medvegjës për këtë vit. Këto para do të përdoren për financimin e projekteve të ndryshme në arsim, kulturë dhe “ruajtjen e gjuhës dhe identitetit të shqiptarëve”, njoftuan më herët nga KKSH. Do të jepen bursa për studentët dhe nxënësit, do të pajisen shkollat, por do të financohet edhe lobimi për sensibilizimin e institucioneve përkatëse ndërkombëtare, siç thonë në NSA, për çështjen e shqiptarëve në jug të Serbisë.
“Në Luginë janë të regjistruara rreth 300 organizata joqeveritare ndërsa deri në vitin 2021 ishin deri në 100. A mund të përmend dikush 10 OJQ që kanë aktivitete konkrete në terren?! Mbani frymën miq, po vijnë 3 milionë euro”, tha Arbër Pajaziti, kryetar i Komisionit të Bujanocit të Alternativës për Ndryshim në opozitë, dhjetë ditë më parë, pasi KKSH njoftoi fillimin e procedurave për shpërndarjen e parave të Kosovës.