Shkruan: N. Stevanoviq
Bujanoc, 12 gusht 2024. Politikanët shqiptarë sot në Bujanoc në protestën e shqiptarëve kundër diskriminimit, që thonë se u bëhet nga shteti i Serbisë, thanë se nuk do të heshtin më derisa komuniteti shqiptar të jetë në represion. Ata kërkuan nga bashkësia ndërkombëtare që të bëjë presion ndaj Serbisë për të përmbushur kërkesat e shqiptarëve, por paralajmëruan edhe protesta të reja.
“Ne jemi këtu sepse qeveria në Beograd nuk na i njeh të drejtat, nuk na i njeh diplomat, na pasivizon vendbanimin, nuk dëshiron të na integrojë”, tha Deputeti popullor nga Bujanoci, Shaip Kamberi, në fjalimin e tij para të pranishmëve.
Sipas tij, qeveria serbe po shkel themelet e Bashkimit Evropian, përfaqësuesit e të cilit kanë qenë ndërmjetës në arritjen e tri marrëveshjeve që nga viti 2001.
– Pse ndodh ky diskriminim? Sepse piromanët e djeshëm u kthyen në zjarrfikësit e sotëm. Beogradi luan me standarde të dyfishta. Pa simetri në të drejta, nuk ka stabilitet. Disa qendra evropiane, për fat të keq, po e tolerojnë Serbinë – tha ai.
Kjo praktikë duhet të ndërpritet, theksoi ai, duke shtuar se shqiptarët kërkojnë angazhimin e vendeve të Kuintit dhe mekanizmave të tjerë ndërkombëtarë për të ushtruar presion ndaj Serbisë për të përmbushur kërkesat e tyre legjitime.
Kryetari i Këshillit Kombëtar të Shqiptarëve, Nevzad Lutfiu, në tubim tha se shqiptarët janë komuniteti më i diskriminuar në Evropë.
-Nga 24 pakicat kombëtare në Serbi, shqiptarët janë në pozitën më të keqe. Ne nuk do të heshtim, protestat do të vazhdojnë, jo se duam, por sepse nuk kemi zgjidhje tjetër – tha ai.
Ai gjithashtu kërkoi nga komuniteti ndërkombëtar që të marrë parasysh kërkesat e shqiptarëve.
– Diplomat tona nuk njihen në Serbi, por njihen në Gjermani. Shteti investon miliona euro në shkollat serbe, asnjë cent në tonat. Popullsia jonë po pakësohet, të rinjtë po largohen. Adresat e tyre po pasivizohen. Kjo duhet të ndalet – tha Lutfiu.
Në tubim folën edhe profesori Llukman Misini nga Presheva dhe studenti Enis Fejzullahu, të cilët nxorrën në pah problemet me të cilat ballafaqohen shqiptarët në fushën e arsimit, duke theksuar se ende nuk ka tekste në gjuhën amtare për nxënësit e shkollave të mesme dhe se diplomat nga Kosova ende nuk njihen.
Protesta e shqiptarëve u zhvillua dy javë pas ndryshimit të qeverisë në Bujanoc dhe largimit në opozitë të koalicionit të partive shqiptare të udhëhequr nga Nagip Arifi, Shaip Kamberi dhe Shqiprim Musliu. Ata mbështetën dhe morën pjesë në organizimin e tubimit.
Të tubuarit në sheshin e Bujanocit mbanin flamujt e Shqipërisë dhe SHBA-së dhe pankarta në të cilat shkruheshin kërkesa si “ndaloni pasivimin”, “duam tekste shkollore në shqip”. Protesta filloi me intonimin e himnit kombëtar shqiptar dhe një minutë heshtje për të rënët e UÇPMB-së.
Në fund të tubimit u lexua një deklaratë me të cilën kërkohet nga autoritetet në Beograd që të zbatojnë dhe respektojnë tri marrëveshjet e nënshkruara deri më tani ndërmjet Qeverisë së Serbisë dhe përfaqësuesve të shqiptarëve, me theks të veçantë në planin 7-pikësh të vitit 2013, për integrimin e shqiptarëve.
Protesta kaloi e qetë, pa asnjë incident.
Videot nga protesta mund t’i shihni në faqen e Bujanovaçkes në Facebook.