Shkruan: N. Stevanoviq
Bujanoc, 19. shkurt 2024. (Foto MPB) – Drejtuesit e kamionëve dhe autobusëve do të jenë në fokusin e policisë rrugore javën e ardhshme në kuadër të aksionit ndërkombëtar që synon zbulimin e shkeljeve. Aksioni zgjat deri më 25 shkurt në 30 shtete evropiane, anëtarë të organizatës ROADPOL (rrjeti i policisë rrugore evropiane).
Ministria e Punëve të Brendshme e Serbisë njoftoi se policia rrugore do t’i orientoj patrullat e saj kryesisht në rrugët me qarkullim më intensiv të autobusëve dhe kamionëve.
“Theks i veçantë do të jetë monitorimi i respektimit të dispozitave të Ligjit për orarin e punës së ekuipazheve të automjeteve në transportin rrugor dhe tahografi, si dhe transportin e mallrave dhe plotësimin e kushteve të përgjithshme për pjesëmarrje në komunikacion nga drejtuesit e kamionëve dhe autobusëve.
Analizat e aksidenteve të trafikut në vitin 2023 tregojnë se kamionët janë përfshirë në 5535 aksidente trafiku, gati dy të tretat e të cilave janë shkaktuar nga drejtuesit e këtyre mjeteve. Nga ana tjetër, autobusët janë përfshirë në 1553 aksidente trafiku, rreth një e treta e të cilave janë shkaktuar nga drejtuesit e autobusëve.
Gjatë kontrollit të qarkullimit rrugor të ushtruar në të njëjtën periudhë, policia rrugore zbuloi rreth 132 mijë shkelje të kryera nga drejtues kamionësh dhe 5200 shkelje të drejtuesve të autobusëve.