Shkruan: N. Stevanoviq
Bujanoc, 27. prill 2024. Arbër Pajaziti, kryetari i këshillit lokal të Alternativës për Ndryshim në Bujanoc, është politikani i parë në Bujanoc që ka shpallur zyrtarisht kandidaturën e tij për kryetar të komunës. Autoritetet partiake ia besuan atij kandidaturën për president, tha ai.
“Po ashtu kam marrë besimin e plotë se me partnerët tanë nga Lëvizja për Bujanocin dhe Unioni demokratik shqiptar do të ndërtojmë koalicion dhe do të pajtohemi për një strategji që do të na sjellë fitore të padiskutueshme”, tha të premten Pajaziti.
Vetëm një ditë më parë u bë e ditur se këto tre grupe politike do të shkojnë së bashku në zgjedhje më 2 qershor. Duke qenë se Alternativa është partia më e fortë në atë koalicion, pritet që kandidatura e Pajazitit të mbështetet nga partnerët e tij.
Pak më shumë se një muaj para zgjedhjeve ai është kandidati i vetëm zyrtar për kryetar të komunës.
Pritet që kandidaturën e tij ta paraqesë edhe Nagip Arifi, kryetar aktual i komunës dhe kryetar i Partisë Demokratike. Me Partinë për Veprim Demokratik (PVD), situata është ndryshe, sepse Ragmi Mustafi, kryetar i Degës në Bujanoc, si dhe Enver Ramadani, zyrtar i partisë dhe kryetar aktual i Kuvendit të Bujanocit, dëshirojnë të propozohen për postin e kryetarit të komunës. Se kush do të jetë kandidati për kryetar të komunës i takon kryetarit të partisë Shaip Kamberi.
Kryetari i komunës zgjidhet nga këshilltarët në kuvend.
Fjala vjen, asnjë nga partitë, grupet e qytetarëve dhe koalicionet, serbe, shqiptare apo rome, ende nuk e kanë bërë publike listën e tyre zgjedhore. Afati për paraqitjen e listës së kandidatëve për këshilltarë është 20 ditë para zgjedhjeve.