Bujanoc, 10 tetor 2024. – Kryetari i Komunës së Bujanocit, Arbër Pajaziti, është takuar të mërkurën në Bujanoc me politikanin opozitar dhe deputet nga Shqipëria, Lulzim Basha, lider i Partisë Demokratike Euro-Atlantike. Nga politikani shqiptar Pajaziti ka kërkuar më shumë mbështetje për shqiptarët në jug të Serbisë.
– Pasi e informova për punën dhe prioritetet e qeverisjes sonë dhe sfidat me të cilat përballemi si shqiptarë, i kërkova zotit Basha, që në cilësinë e deputetit të Kuvendit të Republikës së Shqipërisë, të kërkojë më shumë mbështetje për shqiptarët nga Lugina, si nga shteti shqiptar ashtu edhe nga organizatat ndërkombëtare – tha Pajaziti pas takimit.
Ai shtoi se nga Basha ka marrë garanci të plotë për një angazhim të tillë.
“Bashkëpunimi i komunës së Bujanocit me të gjithë faktorët relevant në përmirësimin e jetës së qytetarëve tanë do të jetë prioriteti ynë”, ka shtuar Pajaziti.