Shkruan: N. Stevanoviq
Bujanoc, 21. nëntor 2024. Kryetari i komunës së Bujanocit, Arbër Pajaziti, deputeti i Bujanocit Shaip Kamberi dhe politikanë të tjerë shqiptarë protestuan të mërkurën pasi policia dhe prokuroria dyshohet se kanë nisur procedurat kundër atyre që janë përgjegjës për mbajtjen e tubimit përkujtimor kushtuar pjesëtarit të ish UÇPMB-së në shkollën fillore në fshati Konçul afër Bujanocit. Udhëheqësit shqiptarë po protestojnë gjithashtu se UÇPMB-ja është etiketuar si “organizatë terroriste” ndërsa po i referohen Ligjit për Amnisti të vitit 2002.
Akademia përkujtimore kushtuar pjesëtarit të UÇPMB-së, Vehbi Rexhepi, thuhet se është mbajtur më 22 maj të këtij viti.
Informata rreth këtij rasti dhe procedurave të mundshme ndaj organizatorëve dhe personave përgjegjës të kësaj shkolle, Bujanovaçke sot ka kërkuar nga Prokuroria e Lartë Publike kompetente në Vranjë, por nuk kemi marrë përgjigje deri në publikimin e tekstit.
– Procedura gjyqësore ndaj organizatorëve të shënimit të kësaj dite dhe shpallja e UÇPMB-së si “organizatë terroriste” nga policia e Bujanocit është një hap i rrezikshëm që kërcënon sigurinë e çdo shqiptari në Luginën e Preshevës – thotë me këtë rast deputeti Kamberi.
Ai ka publikuar edhe Dekretin për shpalljen e Ligjit për Amnisti nga viti 2002, i cili është miratuar pas konfliktit në jug të Serbisë dhe i referohet konkretisht pjesëtarëve të UÇPMB-së.
-Ligji për Amnisti “Gazeta Zyrtare e RFJ-së nr. 37/2002 datë 3 korrik 2002” amnistohen nga “ndjekja penale të gjithë pjesëmarrësit” në konfliktet e armatosura nga 1 janari 1999 deri më 31 maj 2001 – shton Kamberi.
Në mënyrë të ngjashme ka reaguar edhe Ragmi Mustafi- kryetar i Degës së PVD-së në Bujanoc dhe këshilltar i Besnik Bislimit, zëvendëskryeministrit të Kosovës:
“Nëse UÇPMB-ja ka qenë ndonjëherë organizatë terroriste, atëherë edhe unë jam terrorist si çdo shqiptar i Luginës”, ka deklaruar Mustafi.
Për kryetarin e komunës, Arbër Pajaziti, etiketimi i së kaluarës së shqiptarëve si terroriste është i papranueshëm.
– Rasti me shkollën në Konçul dhe stafin e saj nuk duhet trajtuar si rast në të cilin shkelet ndonjë ligj, veçanërisht nëse merret parasysh amnistia e përgjithshme që ishte parakusht për paqe në vitin 2001 – tha ai.
Siç thotë ai, nëse nuk ka respekt të ndërsjellë për të kaluarën, nuk mund të ndërtohet një e ardhme e mirë për të gjithë.
Bujanovaçke është në pritje të përgjigjes nga Prokuroria lidhur me këtë rast.