Shkruan: I. Jovanoviq
Bujanoc, 5. mars 2024. (Foto nga arkivi) – Sa i përket përmirësimit të gjendjes së keqe të palestrës sportive të Bujanocit, sipas drejtorit Nehat Aliu, menaxhmenti i Qendrës Kulturore dhe Sportive “Rinia”, pak mund të bëjë, sepse siç thotë ai, për renovimin e kulmit nevojiten shumë para, të cilat Qendra Sportive nuk i ka. Aliu thekson se në çdo plan dhe program financiar të dorëzuar në Këshillin komunal është komunikuar fakti se çatia i pikon dhe se është dashur të reagohet. Mirëpo, Komuna nuk reagon.
– Unë e drejtoj qendrën prej dy vitesh dhe po mundohem të bëj diçka. Mënyra e financimit është e centralizuar, për një nga gjërat më të zakonshme, i shkruhet një kërkesë Komunës që të na përcjellin fondet. Ne marrim mjete të caktuara nga Komuna, por nuk mundemi vetëm t’i disponojmë – shpjegon Aliu.
I pyetur për deklaratat e nënshkruara nga sportistët dhe lojtarët rekreativë se ata e përdorin sallën e sportit në përgjegjësinë e tyre për shkak të çatisë që rrjedh dhe se QKS “Rinia” nuk mbart asnjë pasojë në rast lëndimi, Aliu është përgjigjur se ai personalisht ka insistuar për këtë sepse përdoruesit filluan të lëndohen.
– Ka ndodhur që një përdorues është lënduar dhe për këtë kam insistuar që të firmosin që për arsye sigurie është përgjegjësia e tyre të përdorin sallën në momentin kur pikon çatia. Nuk mendoj se ka asgjë të keqe të shtysh një lojë ose stërvitje për një ose dy ditë derisa të ndalojë rrjedhja. Aty stërviten edhe fëmijët, pa marrë parasysh nëse lëndohet një fëmijë për shkak të parketit të rrëshqitshëm, askush nuk e dëshiron këtë – thotë Aliu.
Ai theksoi se në çdo plan dhe program të dorëzuar në Komunë ai ka theksuar se rikonstruksioni i kulmit është i domosdoshëm.
– Kur erdha më thanë projekti i rinovimit ka mkoston e 5 milionë dinarëve, tani kostot ndoshta janë më të larta. Është një projekt serioz dhe kërkon shumë investime dhe ne nuk kemi aq shumë fonde. Me këto fonde ne përpiqemi të rregullojmë atë që mundemi. Ne bëmë disa rregullime para zyrave, sepse e zgjatëm kontratën me OSBE-në për 5 vjet. Kemi filluar rregullimin e dhomave të zhveshjes dhe do të ishte mirë të përshtatej edhe pjesa stërvitore. Nuk janë probleme që janë të djeshme, shumica e objekteve nuk janë rinovuar në 20 vitet e fundit. Ne përpiqemi të bëjmë atë që është më elementare, të paktën të mbajmë higjienën – thotë Aliu.
Siç thotë ai, për të është e rëndësishme që të gjithë që vijnë në QKS “Rinia” të jenë të mirëpritur dhe të ndjehen rehat.
Drejtori ka mohuar pretendimet e disa përdoruesve të sallës së sportit se parketi në sallë është dëmtuar për shkak të stendave të vendosura për Panairin e kaluar të Bletarisë, për shkak se nuk ishin vendosur tapete dhe itisonë që parketi të mbrohej.
-Sot kam shëtitur nëpër sallën e sportit dhe kam qenë i pranishëm edhe kur janë hequr stendat që përdoreshin në panair. Nuk është e vërtetë që parketi është i dëmtuar ndërsa tapetet dhe itisonat nuk i kemi vendosur sepse kanë qenë të konsumuara dhe krejtësisht jashtë përdorimit. Të gjithë ata që e shfrytëzojnë sallën mund të stërviten dhe të kryejnë aktivitetet e tyre lirshëm – thotë Aliu.